Ispan va nemis olimlari hamkorlikda izlanish olib borib, televidenie 3—5 yoshdagi bolalarning uyqusi va umumiy sog‘lig‘i holatiga o‘ta salbiy ta’sir ko‘rsatishini aniqlashdi. «Neyche» («Nature») jurnalida bu haqda bayon etildi.
Izlanishga 700 nafarga yaqin bolalar jalb etildi. Ularning 120 nafarida uyqusizlik, bezovta uyqu, behudaga vahimaga tushish, kechasi bir necha marotaba uyg‘onish kabi holatlar kuzatilgandi. Mutaxassislar ularning xatti-harakatlarini ma’lum muddat kuzatgach, barcha ma’lumotlar asosida quyidagi xulosaga kelishgan: yuqoridagilar televizorda berilgan (jumladan, multfilmlardagi) zo‘ravonlik holatlari ta’siri ostida paydo bo‘lgan.

Kanadaning «Di-Veyv Sistems» («D-Wave Systems») kompaniyasi dunyoda birinchi bo‘lib kvant kompyuteri sotuvini amalga oshirdi. «Teknoloji revyu» («Technology Review») manbasida keltirilishicha, uskuna 10 million dollarga baholangan.

Niderlandiyalik olimlar inson oyoq harakatlarini hattoki uch o‘lchamli tasvirda ham aks ettirib berish imkoniga ega poyafzalni yaratishdi. G‘ayrioddiy oyoq kiyimi yaqin o‘rtada sotuvga chiqarilishi rejalashtirilmoqda, deyiladi «Fizorg» manbasida.

Avstraliyalik talabalar o‘ziga xos transport vositasini yaratishdi, deya xabar berdi «Vayred» («Wired») manbasi. Harakat vositasining ikkita katta g‘ildiraklari o‘rtasiga haydovchi o‘rindig‘i joylashtirilgan.

Ulkan muz tog‘lari global isish muammosiga qarshi samarali vosita bo‘lishi mumkin ekan. Monterey ko‘rfazi akvatoriyalari ilmiy tadqiqotchilik instituti olimlari 2007-2009 yillardagi Antarktida muzlarining erishi ko‘rsatkichlarini kuzatgan holda shunday xulosaga kelishdi. Mavzuga bag‘ishlangan maqola «Sayns nyus» («Science News») portalida berildi.  

Yapon olimlari tomonidan Yer yuzidagi shu paytgacha ma’lum mikrometeoritlar ichida eng yoshi «kattasi» aniqlandi. Mazkur samoviy jismlar hajmi 10 mikrometrdan oshmas ekan. Tadqiqotchilarning yangi topilmasi haqida «Vayred» («Wired») manbasida bayon etilgan. Yaponiya orollaridan birida aniqlangan o‘ziga xos topilmalarning «yoshi» 240 million yilga teng, deya taxmin qilinmoqda. Bundan avvalgi bu kabi topilmalar esa ulardan kamida 50 yil «yoshroq» deya belgilandi.

Butundunyo sog‘liqni saqlash tashkiloti bergan ma’lumotlarga ko‘ra, har yili global miqyosda 225 millionga yaqin inson malyariya (bezgak) bilan kasallanib, ulardan taxminan 800 ming nafari hayotdan ko‘z yumadi. Odatda kasallikning oldini olish choralari insonlarga qaratiladi. Lekin ba’zi mutaxassislar kasallikni yanada chuqurroq o‘rganish maqsadida uning tashuvchisi hisoblangan chivinlarga e’tibor qaratishmoqda. Bu haqda «Sayns» ilmiy jurnalida bayon etilgan.

Mutaxassislar Marsning qizil tusga kirishi sababini sayyorada million yil oldin sodir bo‘lgan port­lash bilan izohlamoqda. Okeanortida tashkil etilgan Planetologiya konferentsiyasida bu haqidagi ilmiy farazlar o‘rtaga tashlandi, deyiladi «Kompyulenta» manbasida.

Okeanortidagi Tevatron kollayderida fizik olimlar fanga noma’lum zarrani aniqlashdi. «Neyche» («Nature») jurnali bu haqida xabar berdi. Ma’lumki, kollayder tunnelida proton va antiprotonlar to‘qnashuvi natijasida ular yana kichik zarralarga bo‘linadi. Bu boradagi oxirgi tadqiqotlarda olimlar W-bozonlarning hosil bo‘lish jarayonini tadqiq etishgan.